Rrëfehet nipi i bosit të “Cosa Nostras”: Kemi jetuar me frikë për vite me radhë, mezi e kemi pritur arrestimin…

Nipi i bosit të mafias italiane ‘Cosa Nostra’, që u vu në pranga pas 30 vitesh arrati ka rrëfyer sesi e kanë përjetuar arrestimin e Matteo Messina Denaro.

Siç raportojnë mediat italiane, Giuseppe Cimarosa ka treguar se arrestimi i Denaros ka qenë një shpëtim për të dhe familjen e tij, teksa zbuloi se Denaro i ka kërkuar të ndryshojë për të identitetin por nuk e ka bërë.

“Ne jemi padyshim të lehtësuar nga ky arrestim. Është diçka që të gjithë e kemi pritur, si familja ime ashtu edhe unë. Për dhjetë vjet kemi jetuar me frikë. 

Nuk doja të ndryshoja identitetin tim dhe të bëhesha fantazmë, për shkak të një fantazme tjetër që ata nuk mund ta gjenin. Kam shpëtuar veten sepse kam qenë gjithmonë konsistente me idetë e mia. Idealet e mia nuk ishin këto“, u shpreh ai pas kapjes së bosit të mafias, të cilin ai e ka mohuar publikisht prej disa kohësh.

Anti-Mafia Italiane arrestoi pas 30 vitesh në kërkim bosin e mafias famëkeqe Cosa Nostra, Messina Denaro. Ai u arrestua në një klinikë private në Palermo. Ai ishte duke marrë trajtim rreth orës 09:00, kur karabinierët zbarkuan dhe mbi 100 policë u përfshinë në arrestimin e tij. Messina Denaro është dënuar dhe gjykuar në mungesë për një sërë vrasjesh, përfshirë edhe ekzekutimin e dy prokurorëve të antimafias, Giovanni Falcone dhe Paolo Borsellino në vitin 1992.

Skeda e tij kriminale vazhdon me të tjera ngjarje të rënda si sulmet me bomba vdekjeprurëse të vitit 1993 në Milano, Firence dhe Romë, dhe rrëmbimin, torturimin dhe vrasjen e djalit 11-vjeçar të një mafiozi që ishte kthyer në të penduarin e drejtësisë. Denaro  mbikëqyri gjithashtu shantazhin, hedhjen e paligjshme të mbeturinave, pastrimin e parave dhe trafikun e drogës për sindikatat e fuqishme të krimit të organizuar Cosa Nostra.Ai thuhet se ishte i mbrojturi i Totò Riina, kreut i klanit Corleone, i cili u arrestua në vitin 1993 pas 23 vitesh në arrati. Edhe arrestimi i Denaro është bërë në të njëjtën datë. Por edhe pse në arrati, aktiviteti i Denaro vazhdonte ku mendohet se ai jepte urdhra vartësve të tij nga vende sekrete për ekzekutime dhe trafiqe.