Tirana Film Festival ka bërë një deklaratë zyrtare në profilin e vet në Instagram këtë të shtunë, ku njofton se ka marrë vendimin ta ndërpresë bashkëpunimin ose financimin nga ambasada izraelite dhe ta largojë logon e tyre.
Në deklaratë shkruhet: “Për ne, arti është gjithmonë më i rëndësishëm se politika. Ne qëndrojmë fort kundër të gjitha formave të gjenocidit, dhunës, shtypjes dhe padrejtësisë. Ne duam të krijojmë ura, jo barriera, dhe të nxisim dialogun dhe lidhjen përmes kinemasë. Për këtë arsye, sot kemi marrë masat e nevojshme duke hequr logon dhe duke shkëputur partneritetin me ambasadën izraelite.”
Më tej, shpjegohet se meqënëse shteti izraelit i ndërpreu fondet Festivalit Ophir pas ndarjes së Çmimit për një film palestinez, tërheqja vjen edhe si simbolikë, si një deklaratë parimore, një gjest solidariteti dhe një kujtesë se TIFF-ja mbështet lirinë, artin dhe artistët kudo që janë.
Deklarata e plotë:
Deklaratë Zyrtare – Festivali Ndërkombëtar i Filmit në Tiranë
Festivali Ndërkombëtar i Filmit në Tiranë, i themeluar në vitin 2003, ka qenë gjithmonë një festival i pavarur, i përkushtuar ndaj kinemasë dhe lirisë artistike. Ne kemi jetuar vitet e diktaturës dhe e dimë thellësisht vlerën e lirisë individuale dhe të drejtën për t’u shprehur përmes artit. Që në fillim, TIFF ka promovuar zëra që shpeshherë janë heshtur dhe histori që frymëzojnë dialog, kreativitet dhe mirëkuptim.
Gjatë viteve, festivali ka mbetur plotësisht i pavarur, i lirë nga ndikimi apo presioni politik. Kjo pavarësi është e dukshme çdo vit në përzgjedhjet tona zyrtare, ku përfshihen filma nga mbi 120 vende të botës. Fituesit e TIFF-it ndër vite janë dëshmi e përkushtimit tonë ndaj integritetit artistik dhe lirisë së zgjedhjes. Edhe këtë vit, përzgjedhjet tona nderojnë kineastët, vepra e të cilëve e pasuron festivalin tonë, pavarësisht shpirtit të madh dhe buxhetit modest.
Për ne, arti është gjithmonë më i rëndësishëm se politika. Ne qëndrojmë fort kundër çdo forme të gjenocidit, dhunës, shtypjes dhe padrejtësisë. Mbështetja jonë për artistët dhe publikun është dëshmi e këtij përkushtimi. Ne duam të krijojmë ura, jo barriera, dhe të nxisim dialog e lidhje përmes kinemasë. Për këtë arsye, sot kemi marrë masa të nevojshme duke hequr logon dhe partneritetin me Ambasadën e Izraelit.
Që kur shteti izraelit vendosi të ndërpresë fondet e Festivalit Ophir pas shpërblimit të një filmi palestinez, edhe ne po tërhiqemi simbolikisht, si një deklaratë parimore, një gjest solidariteti dhe një kujtesë se qëndrojmë për liri, për artin dhe për artistët kudo.
Për publikun, artistët dhe mbështetësit tanë, kërkojmë ndjesë për çdo shqetësim apo paqartësi që kjo mund të ketë shkaktuar. TIFF u përket juve po aq sa neve, dhe duam të vazhdojmë ta festojmë kinemanë së bashku, hapur dhe lirshëm.
Misioni ynë është më i fortë se kurrë: Të mbështesim artin në të gjitha format e tij, të fuqizojmë zëra të ndryshëm dhe të ofrojmë një strehë për shprehjen e lirë të ideve. Jemi krenarë që qëndrojmë krah kineastëve, artistëve dhe publikut që e njohin kinemanë jo vetëm si një medium artistik, por si një forcë për empati, dialog dhe ndryshim.
TIFF do të vazhdojë të jetë një vend ku historitë gjejnë skenë, zë dhe një komunitet gati për të dëgjuar, ndërsa pavarësia dhe integriteti artistik mbeten në zemër të gjithçkaje që bëjmë.
MENDO NDryshe, SHIKO NJËSOJ
