Në Shkodër u zhvillua një aktivitet letrar kushtuar shkrimtarit dhe publicistit Xhahid Bushati, me rastin e 73-vjetorit të lindjes së tij. Veprimtaria u organizua nga Lidhja e Shkrimtarëve në Shkodër dhe mblodhi bashkë personalitete të njohura të botës së artit, kulturës dhe letërsisë, si edhe përfaqësues të pushtetit vendor.
Gjatë takimit u vlerësua gjerësisht kontributi shumëvjeçar i Bushatit në letërsinë shqiptare, me theks të veçantë në krijimtarinë për fëmijë, ku ai ka lënë një gjurmë të rëndësishme. Atmosfera u pasurua edhe nga interpretimet artistike të fëmijëve, të cilat i dhanë ngrohtësi dhe gjallëri aktivitetit.
Kryetari i Lidhjes së Shkrimtarëve në Shkodër, Zija Vukaj, e cilësoi Bushatin si një ndër figurat e spikatura të letërsisë shqiptare dhe një emër me peshë në fushën e kritikës dhe studimeve letrare.
I emocionuar nga vlerësimet e marra, vetë Xhahid Bushati ndau me të pranishmit kujtime nga rruga e tij krijuese ndër vite. Aktiviteti u mbyll me mesazhe vlerësuese për figurën e tij dhe me një thirrje drejtuar të rinjve që duan të shkruajnë, duke theksuar rëndësinë e leximit dhe dijes.
