I kënaqur për fitoren me Tiranën natyrisht ka qenë edhe presidenti i klubit të basketbollit Vllaznia, Alban Xhaferi. Në prononcimin e tij për mediat, Xhaferi ka theksuar:
“Kjo fitore me Tiranën është në vijim të fitoreve që kishim në Ligën Ballkanike dhe fitorja me Tiranën na ngroh, sepse u bë një lojë e bukur. Skuadra luajti shumë mirë dhe ne jemi shumë të kënaqur për këtë fitore. Por, normalisht do të kemi ndeshje të tjera të rëndësishme dhe më të vështira. Kemi ndeshje me Partizanin në kryeqytet që duhet vlerësuar maksimalisht dhe pastaj dy finale me Gogën dhe Teutën. Oreksi është shtuar, por gjithsesi jemi në fillimet e punës dhe duhet shumë punë për të arritur objektivat.”
Xhaferi ka një falenderim të veçantë për tifozerinë shkodrane.
“Falenderimi më i veçantë i shkon tifozëve, sepse pallati i sportit ishte i tejmbushur dhe ishte një kënaqësi e madhe. Tifozët bënë një koreografi të bukur me rastin edhe të ditëlindjes së profesor Bledarit. Falenderoj përzemërsisht tifozët dhe i ftoj të na ndjekin edhe në ndeshjen me Partizanin.”
Ndërkohë i pyetur për prezencën e presidentit Meta në pallatin e sportit, Xhaferi dha një mesazh të rëndësishëm: “Është kënaqësi gjithmonë ardhja e presidentit të Republikës, siç është kënaqësi edhe ardhja nesër e një kryeministri apo kryetarit të opozitës. Janë të ftuar në Shkodër. E rëndësishme që basketbolli, sporti, të bashkojë njerëzit por edhe politikën.”
