Nga Imeldi Sokoli
Për ushtrinë e servilëve të kanalizimeve…
Mos-përmbytja nuk përbën tregues performance institucionale. Ajo është një standard bazë funksional, i lidhur drejtpërdrejt me detyrimet ligjore të administratës vendore në fushën e menaxhimit të territorit, infrastrukturës urbane dhe mbrojtjes civile.
Në praktikë, shpesh ndodh që: një gjendje normale operative paraqitet si rezultat i jashtëzakonshëm,
një detyrim institucional interpretohet si arritje politike,
dhe mungesa e emergjencës trajtohet si provë suksesi.
Nga pikëpamja e planifikimit urban dhe menaxhimit të riskut, qytetet nuk vlerësohen për mënyrën se si reagojnë pas reshjeve, por për aftësinë e tyre për t’i parandaluar efektet e tyre përmes sistemeve funksionale, mirëmbajtjes së rregullt dhe investimeve të qëndrueshme në infrastrukturë.
Shkodra nuk ka nevojë për komunikim triumfalist pas çdo episodi meteorologjik.
Ka nevojë për sisteme kullimi dhe kanalizimi që funksionojnë në mënyrë të vazhdueshme, pavarësisht intensitetit të reshjeve.
Ka nevojë për menaxhim të integruar të ujërave, për planifikim territorial të bazuar në risk dhe për vendimmarrje të mbështetur në të dhëna.
Zbatimi i detyrimeve ligjore dhe teknike nuk është meritë politike.
Është përgjegjësi institucionale.
Dhe kjo përgjegjësi matet me qëndrueshmëri infrastrukturore, reduktim të riskut dhe mbrojtje reale të interesit publik — jo me narrativa.
