Një apartament është sekuestruar nga prokuroria në lagjen “Vasil Shanto” në qytetin e Shkodrës pasi dyshohet se është investim për pastrim parash.
Nga hetimet e deritanishme të prokurorisë, rezulton se shtetasi, i cili përdor 3 emra, Leonard Mnella alias Leon Kolmnela alias Leonard Kolmnela në bashkëpunim me shtetasen J.N, kanë kryer elemente të veprës penale “Pastrimi i produkteve të veprës penale ose veprimtarisë kriminale”.
Shtetasja J.N nuk rezulton të ketë burime të ligjshme të të ardhurave që të justifikojnë investimin, por prona është blerë me fonde të transferuara nga Leonard Kolmnela. Ky i fundit po ashtu ishte në kërkim nga Interpol Roma pasi është dënuar me 25 vjet burg për veprat penale të “Organizatë kriminale, drogë, pengmarrje, heqje e paligjshme e lirisë dhe mbajtja pa leje e armëve dhe municioneve luftarake.
Dhe po ashtu është dënuar nga Gjykata e Distriktit të Shteteve të Bashkuara të Amerikës për vepra penale në fushën e trafikimit të lëndëve narkotike, kryer në bashkëpunim.
E sikur të mos mjaftonin të gjitha këto Leonard Mnella alias Leon Kolmnela alias Leonard Kolmnela, në vitin 2013 arriti që nëpërmjet një vendimi gjyqësor të lëshuar nga një Gjykatë shqiptare, të deklarohej i vdekur në Amerikën Latine.
Njoftimi i Prokurorisë:
Prokuroria pranë Gjykatës së Shkallës së Parë të Juridiksionit të Përgjithshëm Shkodër sekuestron një apartament në Shkodër, në kuadër të hetimeve për pastrim parash
Prokuroria pranë Gjykatës së Shkallës së Parë të Juridiksionit të Përgjithshëm Shkodër, në kuadër të hetimeve që janë zhvilluar për veprën penale të “Pastrimit të produkteve të veprës penale ose veprimtarisë kriminale”, e kryer në bashkëpunim, parashikuar nga neni 287/2 i Kodit Penal, ka vendosur masën e sekuestros preventive mbi një pasuri të paluajtshme.
Masa e sekuestros është vendosur mbi pasurinë e paluajtshme:
* Lloji: Apartament
* Sipërfaqja: 103.4 m²
* Adresa: Lagjja “Vasil Shanto”, Shkodër
Nga hetimet e deritanishme rezulton se shtetasi L. M (alias L. K alias L.K alias L.M), i datëlindjes 14.03.1969, në bashkëpunim me shtetasen J. N, dyshohet se kanë konsumuar elementët e veprës penale të sipërcituar. Sipas provave të administruara, pasuria është blerë nga shtetasja J. N me fonde të dyshuara të ardhura nga veprimtari kriminale, të transferuara më parë nga shtetasi L.M. Po ashtu, kjo shtetase nuk rezulton të ketë burime të ligjshme të të ardhurave që të justifikojnë investimin. Shtetasi L. M është denuar nga Gjykata e Distriktit të Shteteve të Bashkuara të Amerikës, Distrikti Jugor i Neë York, për vepra penale në fushën e trafikimit të lëndëve narkotike, kryer në bashkëpunim. Gjithashtu, ky shtetas ishte në kërkim nga Interpol Roma pasi me vendimin nr.71/05 1044/05R.G.C.A, datë 07.10.2005 të Gjykatës së Apelit të Salernos është dënuar me 25 vjet burg për veprat penale të “Organizatë kriminale, drogë, pengmarrje, heqje e paligjshme e lirisë dhe mbajtja pa leje e armëve dhe municioneve luftarake”.
Gjykata ka pranuar kërkesën e Prokurorisë për vendosjen e masës së sekuestros preventive, me qëllim parandalimin e tjetërsimit të pasurisë dhe ruajtjen e saj për konfiskim të mundshëm në përfundim të procesit penal.
