Qyteti italian i Bolonjës është zgjuar i tronditur pas një nate të dhunshme protestash, ku përplasjet mes manifestuesve dhe forcave të rendit shkaktuan dëme në qendrën e qytetit dhe dhjetëra të plagosur.
Incidentet nisën mbrëmjen e 20 korrikut, pas një tubimi të organizuar në shenjë “solidariteti dhe të vërtete” për vdekjen e Abderrahim Fakir. Protesta fillimisht u zhvillua në mënyrë paqësore dhe me pjesëmarrje të madhe, por situata u tensionua kur një grup antagonistësh nga qendrat sociale dhe kolektivet radikale u drejtuan drejt selisë së policisë dhe prefekturës, duke u përplasur me efektivët e rendit të pajisur me mjete kundër trazirave.
Vetëm pas mesnatës, rreth orës 01:00, situata u qetësua. Një grup i vogël aktivistësh qëndroi për pak kohë para selisë së policisë, por u shpërnda pasi disa prej manifestuesve të shoqëruar në komisariat u liruan.
Përplasjet kanë hapur një valë kritikash ndaj kryebashkiakut të Bolonjës, Matteo Lepore, i cili është akuzuar nga kundërshtarët politikë se ka mbështetur organizimin e protestës pa garantuar menaxhimin e situatës.
Sekretari i përgjithshëm i Sindikatës Autonome të Policisë (SAP), Stefano Paoloni, ka kërkuar që kryebashkiaku Lepore të mbajë përgjegjësi për dhunën.
“Për shkatërrimet dhe mbi 50 të plagosurit mes forcave të rendit gjatë mbrëmjes së djeshme në Bolonjë, kryebashkiaku Matteo Lepore duhet të marrë përgjegjësinë e plotë. Organizimi i një tubimi pa pasur mundësinë për ta menaxhuar në mënyrë të ekuilibruar është i papërgjegjshëm”, deklaroi Paoloni.
Sipas autoriteteve, gjatë trazirave në qendër të qytetit, 11 persona kanë pasur nevojë për ndihmë mjekësore nga ekipet e urgjencës. Mes të trajtuarve ishin katër manifestues dhe pesë efektivë policie.
Autoritetet italiane pritet të vijojnë hetimet për identifikimin e personave përgjegjës për dëmet dhe aktet e dhunshme gjatë protestës.
