Kryeministri Edi Rama deklaroi të martën në Bruksel, gjatë Konferencës së IX Ndërqeveritare për negociatat me Bashkimin Evropian, se ligji për Investimet Strategjike do të shfuqizohet, duke theksuar se ai e ka përmbushur tashmë qëllimin për të cilin u miratua.
Lidhur me ligjin për Zonat e Mbrojtura, Rama sqaroi se qeveria nuk parashikon ta anulojë atë, pavarësisht rezolutës së Parlamentit Evropian që kërkon shfuqizimin e ndryshimeve të bëra. Sipas tij, ligji do të rishikohet dhe do të përshtatet me standardet dhe legjislacionin e Bashkimit Evropian, duke korrigjuar çdo dispozitë që nuk është në përputhje me to.
Nga ana tjetër, Komisionerja Evropiane për Zgjerimin, Marta Kos, theksoi se Shqipëria duhet të tërheqë edhe ndryshimet e vitit 2024 në ligjin për Zonat e Mbrojtura, duke i cilësuar ato si një hap të domosdoshëm për përparimin në mbylljen e Kapitullit 27, që lidhet me mjedisin dhe ndryshimet klimatike.
