Nga Ardit Bilani
Zverneci, protesta dhe pyetja që askush nuk po e bën në Shqipëri
Protesta e Zvernecit nuk është (dhe nuk duhet lexuar) si një reagim i thjeshtë i njerëzve që nuk duan investime. Të jemi të qartë: unë personalisht besoj se Shqipëria ka nevojë si ajri për investime serioze në turizëm. Resortet cilësore, rezidencat dhe infrastruktura e lartë mund ta çojnë turizmin shqiptar në një nivel tjetër. Nuk mund të rrimë përgjithmonë vetëm me çadrat e lira dhe hamburgerët.
Por rasti i Zvernecit është ndryshe. Shumë ndryshe.
Transparenca mungon dhe debati devijohet
Ajo që po ndodh në Zvernec është shndërruar në një simbol të një pakënaqësie shumë më të thellë. Dhe pse? Sepse qeveria nuk ka qenë e qartë. As për projektin, as për investitorët, as për ndikimin real në zonë. Sa herë qytetarët kanë kërkuar përgjigje, u është hedhur akuza se janë kundër izraelitëve, arabëve apo të huajve në përgjithësi. Kjo nuk qëndron.
Protestuesit në Zvernec nuk kanë asgjë kundër investitorëve të çdo kombësie. Ata kërkojnë ligj, transparencë dhe mbrojtje të interesit publik. Dhe kjo nuk është e negociueshme.
Protesta e Zvernecit tani është protesta e gjithë Shqipërisë
Kjo lëvizje nuk është më vetëm për Zvernecin. Ajo është bërë një kanal ku qytetarët hedhin jashtë gjithë zemërimin e viteve të fundit: inceneratorët, nafta, korrupsioni, oligarkia, shëndetësia e shembur, por mbi të gjitha – ikja masive e të rinjve dhe shpopullimi i vendit.
Kur nuk të dëgjon askush për vite, mjafton një shkëndijë. Dhe Zverneci doli të ishte ajo shkëndijë.
Prandaj unë them: protestat qytetare nuk duhet të mbeten të kufizuara në një zonë. Ato duhet të shtrihen në çdo qytet të Shqipërisë, kudo ku njerëzit ndjejnë se interesi publik po shkelet. Një demokraci pa zë qytetarësh nuk është demokraci.
Por kujdes: jo kundër investimeve, por kundër abuzimeve
Le të mos ngatërrohemi. Shqipëria ka nevojë për kapital, për punë, për zhvillim. Por një investim që nuk respekton ligjin, biodiversitetin, natyrën dhe të ardhmen e vendit – ai investim nuk është zhvillim. Është thjesht një grabitje e legalizuar. Ne nuk mund të sakrifikojmë natyrën që na ka mbetur, sepse ajo është pasuria jonë më e madhe për turizmin afatgjatë.
Pyetja e madhe që po shmanget
Debati i vërtetë nuk është “pro apo kundër investimeve”. Debati i vërtetë është ky:
Çfarë lloj zhvillimi duam për Shqipërinë? Një zhvillim të mbyllur, të errët dhe të imponuar nga lart? Apo një zhvillim që respekton komunitetet, mbron mjedisin dhe sjell përfitime reale për qytetarët?
Sa më shumë që kjo pyetje mbetet pa përgjigje, aq më shumë pakënaqësia do të rritet. Dhe kur të gjitha kanalet e tjera të shuhen, protesta në shesh bëhet jo vetëm një e drejtë – por një domosdoshmëri demokratike.
