Babai i Ervis Martinaj, Mustafa Martinaj, u paraqit sot në Gjykatën e Posaçme kundër Korrupsionit dhe Krimit të Organizuar, jo vetëm si dëshmitar, por edhe si një prind që akuzon hapur sistemin e drejtësisë për heshtje dhe mosveprim.
I thirrur në lidhje me çështjen e pronave të të birit, ai e shndërroi daljen e tij në një akuzë të drejtpërdrejtë ndaj institucioneve që, sipas tij, “nuk duan ta zbardhin të vërtetën”.
“Fatin e djalit tim e dinë të gjithë, përveç medias dhe Prokurorisë. Djali im është ekzekutuar në Durrës. Si nga e di? Jam babai i tij!”, deklaroi ai.
Një deklaratë e fortë, që ngre pikëpyetje serioze për hetimet dhe trajtimin e këtij rasti.
Mustafa Martinaj bëri të ditur se ka dhënë shpjegime edhe pranë Byrosë Kombëtare të Hetimit, madje me iniciativën e tij personale.
“Kam ardhur vetë. Këta nuk duan ta hetojnë dhe ia kanë lënë Kurbinit”, u shpreh ai, duke lënë të kuptohet për mungesë koordinimi dhe serioziteti në hetim.
Më tej, ai shprehu edhe gjendjen e tij personale, duke theksuar mungesën e besimit te institucionet:
“Nuk kam për çfarë të interesohem. Nuk kam fuqi as për hakmarrje”, tha ai, duke shtuar se është invalid dhe me probleme shëndetësore.
Kjo deklaratë përmbledh dramën e një familjeje që përballet me pasiguri dhe mungesë përgjigjesh.
Rasti i Ervis Martinaj mbetet një nga çështjet më të errëta kriminale në Shqipëri – një zhdukje që ende nuk ka një version zyrtar përfundimtar, ndërsa familjarët flasin hapur për ekzekutim.
Pyetja që mbetet ende pa përgjigje është: nëse “e dinë të gjithë”, pse nuk e zbardh drejtësia?
