Katër persona janë arrestuar dhe kanë marrë masën “arrest me burg” nga Gjykata e Shkallës së Parë në Shkodër, të dyshuar për vrasjen me tritol të 67-vjeçarit Hysni Ymeri.
Gert Bushati, i cili ka pranuar vendosjen e sasive eksplozive në një panel matësish elektrik më 27 dhjetor, është i dyshuari kryesor. Ai ka deklaruar se është kontaktuar nga Edison Hasaj, Ergys Ibrahimi dhe Gjergj Zefi për këtë detyrë, por ka pohuar se nuk ka pasur dijeni për qëllimin vrasës të shpërthimit. Sipas Bushatit, i është thënë që eksplozivi do të përdorej vetëm për t’i trembur njerëzit dhe jo për të shkaktuar vdekje. Ai u shpreh i tmerruar kur mësoi se viktima kishte humbur jetën.
Ndërkaq, tre të tjerët e arrestuar, Edison Hasaj, Ergys Ibrahimi dhe Gjergj Zefi, mohojnë çdo përfshirje në ngjarje dhe nuk kanë dhënë deklarata në gjykatë, duke u përfaqësuar nga avokatët e tyre. Megjithatë, policia ka siguruar prova si përgjime dhe telefonata që mund t’i implikojnë në këtë krim.
Hetimet tregojnë se eksplozivi ishte vendosur më parë në të njëjtin vend por nuk kishte shpërthyer. Pas dështimit të parë, Bushati vendosi tritolin sërish më 27 dhjetor dhe shpërthimi ndodhi dy ditë më vonë, duke shkaktuar vdekjen e Hysni Ymerit.
Seancat për tre të dyshuarit u zhvilluan së bashku, ndërsa Bushati u trajtua veçmas për shkak të pranimit të tij. Ende nuk dihet motivi i vrasjes, pasi tre të dyshuarit nuk kanë dhënë informacion. Policia po heton në lidhje me pista të ndryshme, përfshirë edhe lidhjet me ngjarje të mëparshme kriminale.
Vëllai i viktimës ishte i dyshuar më parë për një vrasje në vitin 1995, ndërsa një kushëri i Hysni Ymerit dyshohet për një vrasje tjetër në vitin 2017, por u arratis jashtë vendit. Hetimet përfshijnë edhe këto pista, si dhe mundësi të tjera për shkaqet e vrasjes së Hysni Ymerit.
Pak ditë para ngjarjes, djali i viktimës, që jeton jashtë Shqipërisë, kishte ardhur në vend për të qëndruar pranë nënës së tij, e cila ndodhej në gjendje kritike shëndetësore.
