Brigjet e Dubrovnikut, një nga simbolet e Adriatikut, janë mbuluar ditët e fundit nga një sasi e madhe mbetjesh plastike, trungjesh dhe materialesh të tjera që, sipas autoriteteve kroate, kanë ardhur kryesisht nga Shqipëria. Rrymat e fuqishme jugore të një stuhie dimërore kanë shtyrë drejt Kroacisë tonelata mbeturinash, të cilat janë përplasur në plazhin Banje dhe përgjatë mureve të vjetra të qytetit.
Ekipet e pastrimit në Dubrovnik po punojnë pa ndërprerje për të larguar mbetjet, ndërsa kamionë të tërë transportojnë ngarkesat drejt zonave të përpunimit. Zyrtarët lokalë thonë se, nga etiketat dhe objektet e gjetura, një pjesë e madhe e tyre vjen nga brigjet shqiptare.
Edhe mediat ndërkombëtare e kanë pasqyruar gjerësisht situatën. “The New York Times” e përshkruan rastin si shembull të krizës së mbetjeve në Adriatik, ku ndotja hedhur në një vend përfundon në bregun e një vendi tjetër, falë rrymave detare.
Pamjet e publikuara nga agjencitë e huaja tregojnë vija të tëra bregdeti të mbuluara nga mbeturinat, ndërsa punonjësit përpiqen t’i mbledhin me mjete të ndryshme, nga lopatat te makineritë e rënda.
Kjo ngjarje ka ringjallur diskutimin për menaxhimin problematik të mbetjeve në Shqipëri dhe rolin e secilit vend në mbrojtjen e Adriatikut. Kroacia ka paralajmëruar se ndotja nga mbeturinat mund të kthehet në një çështje që prek edhe procesin e integrimit europian, duke ngritur shqetësime për standardet mjedisore që Shqipëria duhet të përmbushë.
Në fund të fundit, vala që përplasi mbeturinat në Dubrovnik shërben si një sinjal i fortë: ajo nxori në pah mangësitë shumëvjeçare në trajtimin e mbetjeve, duke e rikthyer problemin si një faturë mjedisore dhe morale për të gjithë rajonin.
