Në vitet e fundit, Shkodra është kthyer në qarkun që mban rekord në kultivimin e kanabisit në Shqipëri. Operacionet policore janë shtuar ndjeshëm, por sasia e bimëve të zbuluara tregon se fenomeni vazhdon të jetë shqetësues.
Vetëm gjatë këtij viti, policia ka asgjësuar rreth 60 mijë bimë dhe fidanë kanabisi në territorin e bashkive Shkodër, Malësi e Madhe dhe Vau i Dejës. Në disa raste janë proceduar penalisht edhe zyrtarë lokalë për shpërdorim detyre dhe moskallëzim të kultivimit.
Sipas raportimeve të mediave, në disa njësi administrative të thella si Shalë, Pult dhe Temal, terreni malor e bën të vështirë kontrollin, duke krijuar kushte të përshtatshme për kultivime ilegale. Krahas kësaj, mungesa e alternativave ekonomike dhe fitimet e larta nga tregu i kanabisit kanë shtyrë shumë banorë të zonave rurale të marrin pjesë në këtë aktivitet.
Një tjetër faktor është edhe përdorimi i sistemit të licencimit për kanabisin mjekësor, ku Shkodra rezulton me 17 fshatra të përfshirë në listën e zonave të licencuara. Kjo ka ngritur dyshime për mundësi abuzimesh dhe përdorim të kësaj skeme si mbulesë për kultivime të paligjshme.
Raporti i “Guardia di Finanza” dhe të dhëna të UNODC kanë paralajmëruar se sipërfaqet e kultivuara në Shqipëri janë trefishuar krahasuar me vitet e mëparshme, ndërsa Shkodra shënon rritjen më të madhe në veri të vendit.
Ekspertët thonë se zgjidhja kërkon jo vetëm forcim të kontrolleve, por edhe politika konkrete që u ofrojnë fermerëve alternativa të ligjshme për të jetuar. Në të kundërt, Shkodra rrezikon të mbetet për vite me radhë “fidanishte e kanabisit”./RealitetiPost/
