Fenomeni i shtimit të apartamenteve me qira ditore po ndryshon ndjeshëm tregun e banesave në Shkodër. Ajo që dikur shihej si një mundësi zhvillimi për turizmin, sot po kthehet në një shqetësim serioz për shumë familje shkodrane, të cilat po e kanë gjithnjë e më të vështirë të përballojnë qiratë mujore.
Në vitet e fundit, sidomos gjatë sezonit turistik, shumë pronarë banesash kanë zgjedhur t’i nxjerrin apartamentet me qira ditore për turistët, pasi fitimet janë shumë më të larta krahasuar me qiranë tradicionale mujore. Si pasojë, numri i banesave të lira për familjet vendase është ulur ndjeshëm, ndërsa çmimet janë rritur me ritme të shpejta.
Sot, gjetja e një apartamenti me qira në Shkodër është bërë një sfidë për çiftet e reja, studentët dhe familjet me të ardhura mesatare. Në shumë raste, qiratë mujore kanë arritur nivele që nuk përputhen aspak me pagat reale në qytet. Ndërkohë që rrogat mbeten të ulëta, qiratë vazhdojnë të rriten, duke krijuar një pabarazi të madhe ekonomike dhe sociale.
Nga ana tjetër, turizmi ka sjellë fitime për pronarët dhe bizneset, por mungesa e një balancimi po rëndon mbi qytetarët që jetojnë dhe punojnë çdo ditë në Shkodër.
Ekspertët e ekonomisë dhe urbanistikës theksojnë se fenomeni i qirave ditore duhet të menaxhohet me politika të qarta, në mënyrë që zhvillimi i turizmit të mos kthehet në barrë për komunitetin vendas. Përndryshe, rreziku është që qyteti të bëhet gjithnjë e më i papërballueshëm për vetë banorët e tij./RealitetiPost
