Inflacioni në vend ka shënuar rritje gjatë muajit shkurt, duke arritur nivelin më të lartë në shtatë muajt e fundit.
Sipas të dhënave të publikuara nga Instituti i Statistikave (INSTAT), inflacioni arriti në 2.5%, nga 2.3% që ishte në muajin janar. Krahasuar me të njëjtën periudhë të një viti më parë, rritja është edhe më e dukshme, pasi në shkurt të vitit të kaluar inflacioni ishte në nivelin 1.9%.
Rritja vjetore e çmimeve gjatë shkurtit 2026 është ndikuar kryesisht nga grupi “Qira, ujë, energji elektrike, gaz dhe karburante të tjera”, me një rritje prej 5.3%. Pas tij renditen “Sigurime dhe shërbime financiare” me 4.3%, “Argëtim, sport dhe kulturë” me 4.2%, “Restorante dhe shërbime akomodimi” me 2.4%, si dhe “Kujdesi personal dhe mallra e shërbime të ndryshme” me 2.3%. Ndërkohë, “Pije alkoolike dhe duhan” dhe “Mobilje, pajisje shtëpie dhe mirëmbajtje e shtëpisë” janë rritur me nga 2.2% secila, ndërsa “Shërbimi arsimor” me 1.9% dhe “Ushqime dhe pije joalkoolike” me 1.7%.
Në kontributin ndaj inflacionit total, ndikimin më të madh e ka pasur grupi “Qira, ujë, energji elektrike, gaz dhe karburante të tjera”, me +1.06 pikë përqindje, i ndjekur nga “Ushqime dhe pije joalkoolike” me +0.60 pikë përqindje.
Ndikime më të vogla kanë ardhur nga disa kategori të tjera, si “Mobilje, pajisje shtëpie dhe mirëmbajtje e shtëpisë” me +0.15 pikë përqindje, “Restorante dhe shërbime akomodimi” me +0.13 pikë përqindje dhe “Pije alkoolike dhe duhan” me +0.11 pikë përqindje. Po ashtu kanë kontribuar edhe grupet “Kujdesi personal dhe mallra e shërbime të ndryshme” (+0.10), “Argëtim, sport dhe kulturë” (+0.08), “Shërbimi arsimor” dhe “Sigurime dhe shërbime financiare” me nga +0.06 pikë përqindje secili.
Sipas parashikimeve të Banka e Shqipërisë, inflacioni pritet t’i afrohet objektivit prej 3% gjatë gjysmës së parë të këtij viti.
Megjithatë, zhvillimet ndërkombëtare, veçanërisht tensionet dhe lufta në Lindjen e Mesme, së bashku me rritjen e çmimeve të naftës, mund të ndikojnë në një rritje të mëtejshme të inflacionit. Nëse çmimet e karburanteve vijojnë të rriten, presionet inflacioniste gjatë muajve të ardhshëm mund të shtohen.
Aktualisht, norma bazë e interesit në Shqipëri qëndron në nivelin 2.5%, por skenarët e rinj ekonomikë mund të detyrojnë autoritetet monetare të rishikojnë parashikimet dhe të marrin masa të reja në politikën monetare.
