Gjenocidi në Gaza bashkon zërin e hoxhallarëve shqiptarë...

Hoxhallarët e Shqipërisë ngrejnë zërin kundër gjenocidit të kryer në Gaza, duke dënuar vrasjet e civilëve, shkatërrimin e infrastrukturës dhe vuajtjet e pafajshme të popullsisë. Ata bëjnë thirrje për ndalimin e menjëhershëm të dhunës, lejimin e ndihmave humanitare dhe ndëshkimin e kriminelëve. Apeli u drejtohet opinionit publik, qeverive dhe organizatave ndërkombëtare për të marrë përgjegjësitë morale dhe ligjore në mbrojtje të jetës dhe dinjitetit njerëzor.

Deklarata

Me Emrin e Allahut, të Gjithëmëshirshmit, Mëshiruesit!

Ne, hoxhallarët e Shqipërisë, nënshkruesit e kësaj deklarate, të vetëdijshëm për përgjegjësinë që kemi ndaj Zotit, si dhe për barrën morale për të qenë në krah të së drejtës, ngremë zërin tonë përballë krimit të pashembullt që po ndodh përpara syve të gjithë botës: gjenocidi ndaj popullsisë martire të Gazës.

Edhe pse palestinezët kanë dekada që vuajnë nën represionin izraelit, që prej dy vitesh, fëmijë, gra, pleq dhe burra po vriten barbarisht dhe po lihen të vdesin urie, spitale e shkolla po shkatërrohen, xhami e kisha po rrënohen, ndërsa e gjithë bota vështron pa bërë pothuajse asgjë. Deri më sot janë vrarë, sipas shifrave zyrtare, mbi 62’000 njerëz, ndërkohë që burime të tjera të pavarura e ngrenë shifrën deri në 100’000 të vdekur dhe të humbur. Nga këta, mbi gjysma janë gra dhe fëmijë. Madje edhe sipas një raporti të vetë ushtrisë që ka kryer këto krime, rreth 83% e të vrarëve janë civilë. Ndërkohë, kriza e urisë, e shërbimit shëndetësor dhe e shërbimeve minimale të jetesës ka kaluar çdo imagjinatë të mundshme. Pothuajse e gjithë infrastruktura jetike e Gazës është e shkatërruar ose e dëmtuar rëndë. Janë vrarë me qindra gazetarë dhe vazhdojnë të vriten. Gaza është kthyer në një plojë gjaku njerëzore që, si asnjëherë tjetër në histori, vëzhgohet në kohë reale nga e gjithë bota, e cila thjesht bën sehir me tmerrin e pamjeve!
Çdo ditë që heshtet për këtë tragjedi është një plagë e re dhe një turp i rëndë në ndërgjegjen e njerëzimit.

Ne shpallim me zë të lartë se:

Ky është një krim historik, një gjenocid i hapur, një padrejtësi që nuk mund të justifikohet me asnjë argument politik, ushtarak apo fetar.

Kriminelët duhet të ndalen menjëherë, lufta të marrë fund, ndihmat humanitare të hyjnë lirshëm në të gjithë territorin, tokat e pushtuara të lirohen dhe kriminelët të dalin përpara drejtësisë.
Çdo gjak i derdhur është dëshmi që rëndon mbi vrasësit dhe mbi ata që i mbështesin.

Opinionit publik shqiptar, dhe më gjerë, i bëjmë thirrje të bashkohet me këtë qëndrim, e të mos qëndrojë indiferent, sepse heshtja sot është bashkëfajësi në krim.

Qeverive, institucioneve ndërkombëtare dhe organizatave humanitare u kërkojmë të marrin përgjegjësitë e tyre morale, politike dhe ligjore për të ndalur këtë masakër gjenocidale.

Ky apel është një thirrje humane dhe një detyrë njerëzore e fetare. Islami na mëson të qëndrojmë kundër padrejtësisë, të mbrojmë të pafajshmit dhe të ngremë zërin kur nëpërkëmbet dinjiteti dhe jeta e njeriut.

Historia do të gjykojë rëndë ata që heshtën, ata që u treguan indiferentë dhe ata që zgjodhën të mbyllin sytë para kësaj mynxyre. Ajo do të jetë dëshmi kundër çdo populli dhe kombi që nuk vendosi qoftë edhe një gur paqeje për të ndaluar këtë kasaphanë.

Duke qenë të vetëdijshëm për mundësitë dhe kapacitetet tona si shqiptarë, ne kërkojmë që drejtuesit tanë politikë dhe fetarë, dhe jo vetëm, të qëndrojnë në anën e duhur të historisë, që është ana e së drejtës, humanizmit dhe së vërtetës.

Gaza sot është kauza e njerëzimit, kauza e drejtësisë dhe e ndërgjegjes universale.

Ne, hoxhallarët e Shqipërisë e ngremë këtë apel me besimin se fjala e së vërtetës nuk shuhet kurrë, sepse Zoti i botëve është në anën e atyre që qëndrojnë për të drejtën.

Zoti është dëshmitar i fjalëve dhe qëndrimeve tona.

Emrat e miratuesve të këtij apeli: