Temperaturat e larta të këtyre ditëve dhe parashikimi për vazhdimësinë e tyre diktojnë marrjen e masave të duhura dhe angazhimin maksimal për t’i ardhur në ndihmë komunitetit, veçanërisht për parandalimin dhe ndërhyrjen në kohën e duhur e me efikasitet në rastet e mundshme të zjarreve.
Nisur edhe nga kjo situatë Kryetari i Bashkisë Shkodër, Benet Beci, inspektoi sot Drejtorinë e MZSH – Shkodër (Mbrojtjes nga Zjarri dhe Shpëtimi). Në takimin me drejtuesit dhe efektivët, teksa i falënderoi dhe i përgëzoi për punën dhe sakrificën në kryerjen e detyrës së tyre të vështirë, kryebashkiaku i siguroi për mbështetjen e vazhdueshme nga ana e Bashkisë në zgjidhjen e problemeve dhe nevojave të këtij reparti me qëllim rritjen e efikasitetit. Shtimi i numrit të efektivëve, mjeteve dhe i stacioneve të zjarrfikseve në territorin e bashkisë Shkodër, si dhe përmirësimi i kushteve të punës, u trajtuan në këtë takim si nevoja emergjente për të cilat do të ndërhyhet.
