Një ditë më parë, Kryeministri dhe kryetari i PS sulmoi kandidatët për deputetë të opozitës, mes të cilave edhe Grida Dumën e Partisë Demokratike, duke komentuar me shprehjen “Gridare ohoho”.
Sot ka reaguar Presidenti Ilir Meta, i cili kërkon nga Kryeministri që t’i kërkojë ndjesë publike Dumës dhe të tërheqë fjalorin që përdori një ditë më parë ndaj saj.
“E dënoj me ashpërsi dhunën verbale dhe linçimin publik, të papranueshëm për traditën shqiptare dhe çdo shoqëri demokratike, të bërë ndaj zonjës, njëherazi nënë e një fëmije të mitur, Grida Duma. Asnjë ndarje politike nuk mund t’i japë të drejtë revanshit të rrugaçërisë, për më tepër kur këto sulme të papranueshme për moralin njerëzor dhe etikën institucionale, konsumohen nga personat e veshur me autoritetin e shtetit. Duke besuar në reagimin e fuqishëm të shoqatave që angazhohen për mbrojtjen e të drejtave të grave, i bëj thirrje Kryeministrit ende në detyrë, të kërkojë ndjesë publike dhe të tërheqë mbrapsht sulmin dhe fjalorin ordiner të përdorur ndaj zonjës Duma”, shprehet Presidenti Ilir Meta.
