Greqia ka rinovuar sërish memorandumin që mban të mbyllur kufijtë tokësorë me vendet fqinje deri në datën 25 Tetor.
Qarkorja e re iu dërgua pikave kufitare pak pas orës 12:00 të mesditës sipas orës lokale, dhe përcakton masat shtrënguese që do të mbajnë të bllokuara kufijtë me Shqipërinë, Maqedoninë e Veriut dhe Turqinë deri në datën 25 Tetor.
Kështu mbetet në fuqi kalimi i kufirit për shtetasist që kanë leje qëndrimi në Greqi, shtetasit grekë dhe punonjësit sezonalë, ndërsa ndalohet të udhëtojnë personat për qëllime turistike. Mbetet po ashtu në fuqi masa e testit negativ për Covid-19 jo më herët se 72 orë para udhëtimit.
Doganat mes dy vendeve do të mbyllen në orën 23:00 deri në 07:00 të mëngjesit çdo ditë. Sërish numri i personave që do të lejohet të kalojnë në Kakavijë do të jetë 750 persona dhe 300 në Kapshticë, ndërsa të gjithë udhëtarët që hyjnë në Greqi, duhet të karantinohen për 7 ditë në banesën e tyre.
Greqia ka marrë masa shtesë edhe në brendësi të vendit, mbas shtimit të ndjeshëm të rasteve me Covid.
Masat janë të karakterit lokal dhe ndryshojnë nga zona në zonë, ndërsa qeverria ka vënë në funksionim edhe një platformë dixhitale, në të cilën çdo qytetar mund të hyjë dhe duke përdorur kodin postar të zonës që ai interesohet, mund të lexojë edhe masat kufizuese që autoritetet kanë vendosur në atë zonë.
