Në vijim të udhëzimeve të Ministrisë së Bujqësisë dhe Zhvillimit Rural, në prefekturën e Qarkut Shkodër është zhvilluar sot një takim urgjent, i thirrur nga prefektja Majlinda Angoni, për të adresuar situatën e konfirmuar të rasteve me murtajë të ruminantëve të vegjël – një sëmundje ngjitëse e dhenve dhe dhive me pasoja të rënda ekonomike për sektorin blegtoral.
Në takim u kërkua bashkëpunim i ngushtë mes strukturave vendore dhe shërbimit veterinar rajonal, aktivizimi i njësive administrative dhe kryepleqve për informimin dhe monitorimin e territorit, si dhe përfshirja e policisë bashkiake në kontrollet në tregje. U theksua nevoja për përcaktimin e vendgropimeve sipas standardeve dhe përgatitjen logjistike për menaxhimin e rasteve të reja.
Autoritetet sigurojnë se nuk ka vend për panik, por kërkojnë vigjilencë dhe ndërgjegjësim nga ana e fermerëve dhe publikut për mbrojtjen e shëndetit të kafshëve dhe sigurisë publike.
