Dy raketa izraelite goditën mëngjesin e së dielës Spitalin Al-Ahli në qytetin e Gazës, duke shkaktuar dëme të mëdha strukturore dhe duke shkatërruar repartet e kujdesit intensiv dhe kirurgjisë. Lajmi u konfirmua nga rrjeti britanik BBC, duke cituar burime në terren.
Sipas raportimeve, stafi i spitalit arriti të evakuojë me shpejtësi pacientët pasi mori një telefonatë paralajmëruese nga një person që pretendonte të ishte pjesëtar i forcave izraelite të sigurisë. Pamjet e publikuara nga rrjeti televiziv Al Jazeera tregojnë dhjetëra pacientë që largohen nga godina nën alarm.
Deri më tani, nuk ka të dhëna për viktima, ndërsa Forcat e Armatosura të Izraelit (IDF) nuk kanë bërë ende një deklaratë zyrtare mbi sulmin.
Nga ana tjetër, një zëdhënës i Hamasit e dënoi ashpër ngjarjen, duke akuzuar Izraelin se po ndjek një plan sistematik për shkatërrimin e sektorit shëndetësor në Rripin e Gazës. “Izraeli ka shkatërruar dhe nxjerrë jashtë funksionit qëllimisht 34 spitale, si pjesë e një fushate të mirëorganizuar për të çmontuar çdo mbetje të sistemit të kujdesit shëndetësor,” tha zëdhënësi.
Ky incident vjen vetëm pak muaj pasi, në tetor të vitit 2023, një shpërthim i fuqishëm në të njëjtin spital la qindra të vrarë. Zyrtarët palestinezë atëherë akuzuan Izraelin për sulmin, ndërsa Tel Avivi mohoi përfshirjen.
Situata humanitare në Rripin e Gazës mbetet tejet kritike, me spitale dhe qendra mjekësore që po përballen me mungesë të theksuar të pajisjeve dhe stafit mjekësor.
