Kombëtarja shqiptare e femrave ka regjistruar një fitore domethënëse në Shkodër, duke triumfuar 4-0 ndaj Kroacisë. Nën drejtimin e trajnerit Armir Grima, skuadra kuqezi siguroi tre pikë të rëndësishme në përpjekjen për të shmangur rënien në Ligën C.
Shqipëria e nisi ndeshjen me vrull, duke gjetur golin e parë që në minutën e 14-të me Berishën. Vetëm dhjetë minuta më vonë, Hilaj e dyfishoi epërsinë, duke i dhënë një avantazh të sigurt skuadrës. Dominimi vazhdoi edhe në fraksionin e dytë, ku Doçi dhe Hamonikaj vulosën rezultatin final 4-0.
Falë kësaj fitoreje, Shqipëria ngjitet në kuotën e 3 pikëve pas tre ndeshjeve të para, ndërsa vijon garën për të siguruar qëndrimin në Ligën B. Ndërkohë, Çekia dhe Ukraina mbeten favoritët kryesorë të grupit në luftën për promovim në Ligën A.
