Premtimin që rruga do të përfundonte këtë verë e kishte bërë në rrjetin social vetë kryeministri Edi Rama. Aktualisht fadromat në zonë vijojnë të punojnë, e kantineri është i ndarë në disa faza.
Diku ende kryhen thyerje të malit për zgjerimin e rrugës, pak kilometra më tutje ndërtohen veprat e artit, e në një tjetër segment muret mbrojtëse.
17 kilometrat e rrugës prej Qafës së Thorës e deri në brendësi të fshatit Theth parashikohet të përmbyllen brenda fundvitit.
“Vështirësi ka pasur shkëmbi që ka qenë shumë i fortë, por edhe gabimet që janë bërë në projekt, që na është dashur që t’i korigjojmë dhe të bëjmë një rishkim të projektit”, shprehet Elton Llorja, inxhinier.
Specifikë e kësaj rruge janë shtigjet, për të cilat zgjidhja ka qënë e pjesshme, e që mund të ndikojë në lëvizjen e gjësë së gjallë, karakteristikë e këtyre bjeshkëve.
Elton Llorja:”I kemi respektuar rrugët ekzistuese dhe shekullore, i kemi përshtatur”
Gjerësia e asfaltit do të variojë nga 4m-4.75m dhe do të ketë 3 tunele për mbrojtjen nga ortekët e borës. Ky investim i Bankës Botërore do të kushtojë 763, 302, 700 lekë dhe pritet të ketë një impakt pozitiv për parkun kombëtar të Thethit, duke lehtësuar komunikimin me Shkodrën si dhe duke i dhënë fund izolimit disa mujor në dimër.
