Gjatë 24 orëve të fundit, Policia e Shtetit njofton se ka pritur një fluks të lartë telefonatash në numrin unik 112.
Në njoftim kërkohet nga ana e çdo qytetari që të racionohen thirrjet telefonike dhe jo për çdo pyetje informuese të telefonohet 112.
Kryesisht pyetjet e qytetarëve bëhen lidhur më pamundësinë e lëvizjes me automjet.
“Duke kërkuar mirëkuptimin e çdo qytetari dhe ndihmën e tij, apelojmë të racionohen thirrjet telefonike drejt 112, duke u lënë mundësinë të marrin shërbim atyre që kanë më tepër nevojë për ndihmë. Kjo nuk është koha që për çdo pyetje informuese të telefonohet 112, të tilla si pamundësia e lëvizjes me mjet, me këmbë etj. 112 nuk është Salla Emergjente për sqarim pyetjesh, por për marrje denoncimesh apo shqetësimesh. Kjo merr një tjetër rëndësi specifike në këto momente. Kufizimi dhe ndalimi i qarkullimit është një sakrificë që i ndihmon parandalimit të përhapjes së COVID-19 dhe kapërcimit sa më lehtë e shpejtë të kësaj situate”, njofton Policia.
