Pas deklaratës së liderit të PD, Lulzim Basha se 25 prilli ishte një maskaradë elektorale dhe se do të bëjë gjithçka për të rrëzuar pushtetin e Edi Ramës, vjen kundërpërgjigja e kryeministrit.
Në “Twitter”, Rama tha se fokusi i PS nuk është të merren me akuza e kundërakuza, por të ngjisë Shqipërinë në majë. Për opozitën, shtoi ai, vijon të jetë e shtrirë dora e bashkëpunimit.
“Humbësit fokusohen tek fituesit. Fituesit fokusohen tek fitorja! Mandati ynë i Tretë nuk do t’i ngjajë dy të parëve në raport me humbësit. Ata le të merren me ne, ne do të merremi me ngjitjen e Shqipërisë në majë. Dora jonë për ta do jetë e shtrirë. Ftesa jonë për ta është e hapur! Shqipëria meriton shumëfishimin e përpjekjeve tona dhe të gjitha energjitë ne do t’i harxhojmë vetëm për triumfin e këtij vendi, që e duam kampion të Ballkanit në turizëm, energji, bujqësi, inovacion e shërbime digjitale për qytetarët! Lufta e vjetër politike s’është më puna jonë!”
