Në kulmin e debatit për një kryebashkiak socialist që është kapur duke thithur ko.kainë në publik, Kryeministri Edi Rama ka zgjedhur të flasë për një ngjarje që daton më 15 Janar; Padinë që ai vetë ka bërë ndaj kryeministrit të Kosovës Ramush Haradinajt.
Në reagimin për TCH, Rama e cilëson Ramushin një politikan që ka dëmtuar Kosovën në sytë e ndërkombëtare dhe i ka dhënë avantazh Serbisë. Rama nuk kursehet kur thotë se “Ramushi është nga ai soj politikanësh që s’kanë fijen e respektit as për fjalën, as për të vërtetën, as për publikun. Unë nuk ulem dot në nivelin e shpifësit publik për ta luftuar berllogun me berllog! (Berllog në dialekt do të thotë plehra)
Reagimi i plotë i kryeministrit Edi Rama:
“Ramushi e ka kthyer shpifjen në pu.shkë që kur ka lënë pu.shkën! Por nëse për pu.shkën i’a kam bërë të gjitha nderimet e mundshme dhe të merituara, për shpifjet nuk mund t’i bëj asgjë tjetër përveçse ta ftoj në Gjykatën e Kosovës që t’u dalë për zot atyre që ka nxjerrë nga goja! Sepse ndryshe nga Ramushi dhe nga ai soj politikanësh që s’kanë fijen e respektit as për fjalën, as për të vërtetën, as për publikun, unë nuk ulem dot në nivelin e shpifësit publik për ta luftuar berllogun me berllog! Pafytyrësi nuk është të shkosh në gjykatë për t’u mbrojtur nga një shpifës që të ka cënuar publikisht dinjitetin, po të përdoresh kanalet e komunikimit publik për të shpifur në mënyrë të përsëritur!
Nuk është akt i turpshëm t’i nënshtrohesh gjykimit të drejtësisë si viktimë e një shpifësi që të sulmon si tradhtar të kombit me fabrikime të ulëta, po turp është të bësh agresorin ndaj dikujt tjetër për të manipuluar opinionin publik duke fabrikuar gjëra krejt të paqena!
E vërteta është se unë kam dashur ta ndaj Kosovën, po aq sa ç’ka dashur Ramushi ta ndajë Princ Harryn nga Familja Mbretërore! Shkurt fjala, komandanti i djeshëm i UÇK-se Ramush Haradinaj, e ka merituar dhe do ta ketë për gjithë jetën respektin tim, për gjithçka i ka dhënë kauzës së lirisë së Kosovës, ndërsa politikani i sotëm Ramush Haradinaj, meriton vetëm keqardhjen time për bërllogun politik e gjuhësor ku ushtron veprimtarinë dhe pushtetin e tij.
Është dëshpëruese kur sheh se si politika qorre e Ramushit e ka dëmtuar keq Kosovën në sytë e miqve të saj të mëdhenj dhe i ka dhënë Serbisë një avantazh te vazhdueshëm në arenën ndërkombëtare në raport me Kosovën. Uroj që padia ime të vlejë për t’u hapur sadopak sytë atyre që kanë rënë pre e berllogut politik e mediatik të Prishtinës e të Tiranës.
