Janë zbardhur detaje të reja nga kontrollet e zhvilluara mbrëmjen e djeshme (15 mars) nga forcat RENEA në Sauk, në tentativë për të gjetur Eljo Haton, i cili njihet si “ushtari” i Ervis Martinajt.
Bëhet me dije se gjatë kontrolleve, poshtë një pallati në Sauk, policia gjeti një makinë të blinduar e cila i përket, Emiljano Ninës, kushëririt të Ervis Martinajt, i cili momentalisht ndodhet në qeli, për shkak të aksidentit pak muaj më parë në digën e Liqenit Artificial.
Brenda në automjet janë gjetur armë dhe bllokues valësh, ndërsa makina përdorej momentalisht nga Olsi Gjoshi, i cili është shpallur në kërkim nga policia.
Sa i përket kërkimeve për gjetjen e Hatos, policia nuk pati rezultat. Hato dyshohet se të jetë autori i vrasjes së Gentjan Bejtjas pasditen e djeshme. Vrasja dyshohet se është kryer për motive hakmarrjeje.
Njoftimi i policisë:
Tiranë/Vijon operacioni mbarëkombëtar “Sundimi i ligjit”.
Goditet, nga Drejtoria e Forcës së Posaçme Operacionale, në Departamentin e Policisë Kriminale, në DPPSh, dhe Komisariati i Policisë Nr. 1, një rast i armëmbajtjes pa leje.
Sekuestrohen 2 armë zjarri (një pistoletë dhe një automatik), me krehra dhe sasi municioni luftarak, si dhe një bllokues valësh, që u gjetën në një automjet të parkuar, në Sauk.
Punohet për kapjen e një 37-vjeçari, i cili dyshohet se përdorte automjetin, si dhe u referuan materialet në Prokurori, për pronarin e tij.
Shërbimet e Drejtorisë së Forcës së Posaçme Operacionale, në Departamentin e Policisë Kriminale në DPPSh, dhe Komisariati i Policisë Nr. 1, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, në zbatim të masave të përcaktuara në planin operacional mbarëkombëtar “Sundimi i ligjit”, bazuar në informacionet e siguruara në rrugë operative, kanë intensifikuar kontrollet dhe si rezultat:
▪️Në rrugën “Xhabrahimi”, Sauk i Vjetër, shërbimet e Policisë, kanë gjetur në parkingun e një pallati, automjetin në pronësi të shtetasit E. N., 28 vjeç, (aktualisht ndodhet në paraburgim të IEVP 313, Tiranë), i cili dyshohet se përdorej nga shtetasi O. Gj., 37 vjeç.
Brenda automjetit janë gjetur dhe sekuestruar, në cilësinë e provës materiale dy armë zjarri (një pistoletë dhe një automatik), krehra dhe sasi municioni luftarak si dhe një bllokues valësh.
Në vijim të veprimeve u referuan materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për shtetasin E. N., dhe po punohet për kapjen e shtetasit O. Gj.
