Dy shtetas janë vënë në prangat e Policisë së Tiranës pasi shpërndanin drogëra të forta, kryesisht në lokalete natës, ndërsa është shpallur në kërkim bashkëpunëtori i tyre.
Gjatë kontrolleve “blutë” kanë sekuestruar sasi lëndë e dyshuar narkotike kokainë, tabelë policie, 3 automjete, 5 aparate celulare, peshore elektronike dhe shumë parash të cilat dyshohet se janë përfituar nga aktiviteti kriminal.
Në pranga janë vënë shtetasit Arbër Bardhi, 25 vjeç dhe Vilson Çepele, 38 vjeç, ndërsa në kërkim është shpallur shtetasu E.Ç, 26 vjeç.
Njoftimi i policisë:
Tiranë/Finalizohet operacioni policor i koduar “Clubs”, për goditjen e aktivitetit kriminal të shpërndarjes së drogave të forta.
Vihen në pranga 2 shtetas që shpërndanin doza të drogave të forta, në Tiranë, kryesisht në lokalet e natës. Shpallet në kërkim bashkëpunëtori i tyre.
Sekuestrohen një sasi lënde e dyshuar narkotike kokainë, tabelë policie, 3 automjete, 5 aparate celulare, peshore elektronike dhe shuma parash që dyshohet se janë përfituar nga aktiviteti kriminal.
Seksioni për Hetimin e Narkotikëve në DVP Tiranë, në bashkëpunim me Drejtorinë e Forcës së Posaçme Operacionale në Drejtorinë e Përgjithshme të Policisë së Shtetit, në vijim të hetimeve të kryera me metoda proaktive, nën drejtimin e Prokurorisë së Tiranës, për goditjen e aktivitetit kriminal të shitjes së lëndëve narkotike, kanë organizuar dhe finalizuar operacionin policor të koduar “Clubs”.
Si rezultat i këtij operacioni janë arrestuar në flagrancë shtetasit A. B., 25 vjeç dhe V. Ç., 38 vjeç, si dhe u shpall në kërkim shtetasi E. Ç., 26 vjeç, të tre banues në Tiranë.
Nga hetimet e kryera me metoda proaktive ka rezultuar se këta 3 shtetas kanë bashkëpunuar me njëri-tjetrin, për shpërndarjen e dozave të drogave të forta, në zona të ndryshme të Tiranës, kryesisht në klubet e natës.
Gjatë operacionit janë sekuestruar 400 gramë lëndë e dyshuar narkotike kokaine, 1 tabelë policie, 3 automjete, 5 aparate celulare, 1 peshore elektronike, 76 800 lekë të rinj dhe 175 euro, që dyshohet se janë përfituar nga aktiviteti kriminal i këtyre shtetasve.
Vijon puna për kapjen e shtetasit të shpallur në kërkim.
Materialet i kaluan Prokurorisë pranë Gjykatës së Rrethit Gjyqësor Tiranë, për veprën penale “Prodhimi dhe shitja e narkotikëve”, kryer në bashkëpunim.
