Ndryshimet në strukturën demografike të Shqipërisë gjatë 10 viteve të fundit pasqyrojnë tendenca të forta urbanizimi, migrimi të brendshëm dhe emigracioni duke bërë që disa qarqe të pësojnë tkurrje të konsiderueshme në numrin e familjeve.
Pas krahasimit të të dhënave të Censit të vitit 2011 me ato të regjistuara nga Cens 2023 shohim se 8 qarqe të vendit janë përballur me zbrazje. Në 8 qarqet e vendit në total, përgjatë një dekadë, regjistrohen rreth 22,900 familje më pak. Pra, sipas përllogaritjeve rezulton se në një vit u larguan mesatarisht 2,300 familje.
“Scan Intel” ka analizuar shifrat për të kuptuar se cili qark e ka përjetuar më shumë valën e migracionit dhe emigracionit në vend. Sipas të dhënave, Dibra ka përjetuar një tkurrje prej 15%, duke humbur kështu rreth 4,445 familje.
Shkodra gjithashtu ka patur një rënie të ndjeshme të numrit të familjeve në 10 vitet e fundit. Sot, në Shkodër janë 10.5% ose 5,750 familje më pak se në vitin 2011, duke u renditur kështu si ndër qarqet me tkurrjen më të madhe në vlerë absolute.
Nga ana tjetër, Korça ka pësuar një pakësim prej 7.13% të numrit të familjeve. Në të njëjtën kohë, Kukësi dhe Lezha janë në një situatë të ngjashme lidhur me shifrat e largimit të familjeve. Në këto qarqe sot numërohen 6.31% dhe 5.16% më pak familje respektivisht.
Përkundrejt kësaj prirjeje të përgjithshme tkurrjeje, disa qarqe si Gjirokastra dhe Fieri kanë ruajtur një nivel të qëndrueshëm të numrit të familjeve. Ndryshimi në Fier është minimal, me një rënie prej vetëm 0.8%, ndërsa Gjirokastra ka parë një rritje të lehtë prej 2.22%, e cila mund të lidhet me përpjekjet për të zhvilluar turizmin.
Të njëjtën tendencë rritëse reflektojnë edhe 3 qarqe të tjera të vendit si Tirana, Durrësi dhe Vlora. Konkretisht, ndër qarqet që kanë përjetuar rritje të numrit të familjeve, Tirana kryeson me një shtesë prej më shumë se 51,000 familjesh ose 26.12%. Këto shifra theksojnë se migrimi nga zonat rurale drejt Tiranës ka qenë një prirje e pandalshme dhe se kryeqyteti mbetet qendra kryesore e tërheqjes për shqiptarët që kërkojnë mundësi më të mira ekonomike, punësimi dhe arsimimi.
Një tjetër qark që ka shënuar një rritje të moderuar është Vlora, e cila sot numëron rreth 2,952 familje më shumë. Në vlerë nominale themi se ndryshimi i numrit të familjeve në një dekadë është 5.79%. Zhvillimi i industrisë së turizmit dhe afërsia me detin mund të kenë ndikuar pozitivisht në tërheqjen e banorëve të rinj, si dhe në ruajtjen e familjeve ekzistuese. Po ashtu, Durrësi ka parë një rritje prej 2.99%. Sipas Cens 2023, sot Durrësi ka rreth 2,000 familje më shumë se në vitin 2011-të./scan/
